2006/08/28

Files audibile

Iste registrationes de sono es facite con Audacity
http://audacity.sourceforge.net/
un programma gratuite con lequal on pote facer files mp3.
Con le programma eSnips,
http://www.esnips.com/download/
que anque es gratuite, on pote cargar tal files in internet e facer los exequibile in paginas web. Con eSnips on pote cargar usque a 1 GB gratuitemente.

In infra tu pote leger le texto e si tu desira ascoltar in le mesme tempore como tu lege tu debe cliccar sur le imagine con le button dextere e seliger le alternativo "Aperi in un nove fenestra" (Öppna i nytt fönster). Quando le lectura comencia tu pote minimar ille pagina e retornar al prime pagina ubi le texto es.

In le libro “Joieles spiritual” per le famose interlinguista Toma Macovei on pote leger, in interlingua, iste historias famose. Iste libro interesssante, plen de historias curte es vendite per Servicio de Libros. Illo costa solmente 7 €.
Le adresse es http://www.interlingua.com/libros/index.html

Mathematica e chaco
Mathematica e chac...
Hosted by eSnips



Le mathematica e le quadratos de chaco.

Le ludo del chaco ha apparite in India circa le fin del 5-e seculo e ha penetrate in Europa per le intermedio del arabes.
Pro poner in evidentia le rhythmo disconcentrante de crescimento del progression geometric comparate con le plus modeste del progression arithmetic, le mathematicos se servi del narration ingeniose ligate al tabuliero de chaco:
Sheran, ancian rege de India, volente recompensar su citatano Sesa, qui veniva de inventar le ludo de chaco, le peteva dicer qual cosa ille voleva reciper como recompensa.
-Potente monarcho, diceva Sesa, io demanda que vos face placiar un grano de frumento sur le prime quadrato del tabuliero.
On presto apportava le grano demandate.
-Nunc, diceva Sesa, vole ben ordinar que on pone duo granos sur le secunde quadrato, quatro sur le tertie, etc. etc., duplicante semper le numero de granos del quadrato precedente. Mi recompensa essera le frumento destinate a plenar le ultime quadrato de mi ludo.
Le rege, ignorante o non remarcante le consequentia de iste progression geometric, surrideva coram un exigentia tanto meschin e pensava que Sesa esseva troppo modeste e voleva jocar. Ma le mathematicos del pais informava le rege que pro trovar le quantitate de granos necesse pro le ultime quadrato, on debeva seminar tote le superfacie del terra, e que octo vices le tote recolta esserea necesse pro satisfacer le avide Sesa.
Le numero de granos de frumento destinate al 64-e quadrato del planca del ludo se compone de facto in 20 cifras, plus que 18 trilliones pecias, lo que corresponde a circa 1 billion tonnas.




Le sage dervich
Le sage dervich.mp...
Hosted by eSnips



Un arabe habeva lassate a su tres filios como hereditage dece-septe camelos. De illos debeva le primogenite hereditar le medietate, le secunde un tertio e le plus juvene un none parte. Quando le tres filios essayava divider le hereditage, illes trovava, que le voluntate de lor patre non poteva complir se. Illes non poteva divider le dece-septe camelos ni per duo, ni per tres, e ni per novem.
Al fin illes demandava le consilio de un dervich. Ille gaudeva del occasion de poter servir qua mediator.
Primo ille offereva le fratres su proprie camelo gratis. Le fratres habeva ora dece-octo camelos, e le dervich nunc poteva facer le division sin difficultate. Le primogenite recipeva le medietate, dunque novem camelos, le secunde un tertio, dunque sex camelos e le plus juvene un none parte, dunque duo camelos. Summa dece-septe camelos. Le camelo restante le tres fratres con gaudio dava al dervich como recognoscentia pro su adjuta.




Le ovo de Columbo3
Le ovo de Columbo3...
Hosted by eSnips


Le ovo de Columbo
Ab circa le fin del XV-e seculo, curte tempore post le discoperta del nove mundo - le America futur - per la grande navigator Christophoro Columbo ubique le homines non habeva altere subjecto de discussion que le nove regiones.
Unquam, quando Columbo se trovava a un partita de placer, emergeva de novo le discussion re le discoperta del nove regiones. Alcuno inter le convivas, maximo invidiose e plen de malitia, diceva.

- "Nos non comprende proque on face tante caso pro iste si-dicite grande discoperta? Nihil ha essite plus simple que arrivar a illo."

- "Como assi?" Demandava Columbo calmemente.

- "Illo ha debite solmente venir a tu pensata , assi… ir sur le aqua rectemente in avante…. e isto ha essite toto."

Sur le tabula era qualque ovos cocite. Columbo prendeva un ovo, surrideva e diceva a illes qui le diffamava:

- "Qui inter vos pote facer que iste ovo sta recte in alto sur un del capites?"

Illes essayava alternativemente omnes, sed necuno succedeva, e totes debeva renunciar. Tunc Columbo prendeva le ovo e, colpante lo contra le tabula a un capite, lo applattava un pauco e lo establiva rectemente.
Omnes comenciava critar:

- "S....ed, isto anque nos sapeva ! Nihil plus simple."

- "Certo que si!" les respondeva Columbo, surridente ludificantemente, - "nihil plus simple – exactemente como anque le discoperta del nove regiones. Vos debe solmente facer isto apparer in vostre pensata …. E poner lo in application."

2006/08/22

Le petra runic de Rök

Un excursion del participantes del Incontro Nordic in Vadstena, 2006

Durante le cursos intensive ante le 10e Incontro Nordic in Vadstena il anque habeva excursiones interessante. Uno esseva le excursion a Rök ubi Johan Wigforss, un membro del Societate Svedese pro Interlingua narrava del petra runic famose. Ille es archeologo e su narration esseva multo agradabile e naturalmente multo competente.


Johan Wigforss narra



Iste petra runic es un del plus remarcabile in le mundo e contine le plus longe scriptura de omne petras runic in le mundo, plus que 700 signos (170 parolas). Le texto es multo decorative lo que face le petra un obra maestral artistic. Illo probabilemente es gravate durante le annos 800 ma omne expertos non es de accordo. Durante multe annos le petra ha essite murate in le ecclesia ma desde 1843 illo sta presso le ecclesia, in iste dies anque fornite con un tecto protective.
Le scriptor debe ha habite grande cognoscentia de contos mythic e del ideas e credentias de ille tempore. Le texto es multo difficile comprender, i.a. a causa de codices e signos superflue ma anque a causa de referentias a eventos difficile de interpretar. Il anque ha existite plure formas de litteras runic durante le seculos. Il ha textos sur omne lateres del petra, mesmo sur le latere superior. Le altitude es 3,5 m. ma un metro es sub le sol. Le peso circa 4 tonnas.
Le texto se tracta de un persona appellate Vämod pro lequal le patre, Varin, ha elevate le petra pro laudar su filio.




Inter le sagittas rubie sta "aft " lo que es le initio del texto:

In le prime duo lineas sta:


"aft uamuþ stonta runaR þaR n uarin faþi faþiR aft faikion sunu sakum..."

"Till minne av Vämod står dessa runor. Men Varin skrev dem, fadern, till minne av den döde sonen..."

"Pro rememorar Vämod sta iste runas. Ma Varin los skribeva, le patre, al memoria del filio morte..."

Isto es le alphabeto que esseva usate durante ille tempore, kortkvistrunor, ma il ha plure alteres:




In Wikipedia, le encyclopedia polyglotte in internet io nunc ha scribite un articulo un poco plus detaliate re iste petra runic. Vide http://ia.wikipedia.org/wiki/Petra_runic_de_R%C3%B6k

2006/08/17

Vokabel - un adjuta pro apprender vocabulos

In ”Hjälp/Adjuta” del programma Vokabel il ha instructiones complete. Studia los e tu trovara multe finessas usabile.

Le programma Vokabel es construite per Per-Erik Kristensson, un membro del Societate Svedese pro Interlingua. Le programma es multo professional e Per-Erik ha recipite plure mentiones honorific pro iste programma que es excellente quando on desira apprender vocabulos e phrases simple. Uno del multe avantages es que on facilemente pote facer su proprie vocabularios e si on desira completar un vocabulario il es facile adder nove vocabulos, anque in vocabularios compilate per altere personas. Le programma es gratuite e on pote trovar lo in le adresse http://www.pekspro.com/ , un pagina que es scribite in svedese e anglese. Per-Erik anque ha construite plure programmas pro intertenimento que es accessibile in le mesme pagina.

Pro discargar Vokabel clicca duple sur “Ladda ned Vokabel”.

Le programma Vokabel functiona in computatores con Windows 95 e omne plus nove variantes. Illo solmente require 590 kB. Le fenstras e le instructiones es traducite in sex linguas, inter illos svedese e interlingua. Le grande labor con traduction in interlingua es facite per le previe presidente de SSI, Jan Årmann.

On pote facilemente alterar le lingua de interfacie in: Verktyg/Utensiles – Inställningar/Configurationes – Avancerat/Avanciate – Ändra språk/Cambia lingua

Instruction pro adder nove vocabulos

In le fin de un vocabuario il ha un linea con tres positiones appellate Nove –Nove- Nove.
Clicca duple in le prime position al sinistre (vide le sagitta in le imagine) e inscribe le nove parola. Clicca “Enter”. Isto es importante. Insere le traduction in le sequente position e clicca “Enter”. Le tertie position es pro informationes e explicationes (synonymos p.ex.) e es voluntari ma clicca “Enter” anque ibi.

On anque pote adder listas complete de vocabulos scribite in Word o altere programmas pro tractamento de textos. Alora le parola e su traduction debe esser separate per TAB o iste signos: ; : , = - .
P.ex. hund, can
katt, cato
föl, pullo, (cavallo neonate)


Copia toto quando le lista es preste e insere toto in le prime fenestra “Nove” (Vide le sagitta in le imagine). Alora omne parolas essera inserite in bon ordine etiam si on ha scribite explicationes solmente in alcun casos.Un solution genial!

Instruction pro placiar un nove parola in loco correcte

Clicca Redigera/Redige – Markera alla/Marca totes Clica Redigera/ Redige – Sortera/Sorti Nunc le nove parola se trova in loco correcte.

Instruction pro cercar vocabularios in interlingua

Il es necessari haber files con le formato “gls” e le files usate per Babylon, “bgl”, non functiona. In plus le grande vocabulario per Pian Boalt non es apte pro Vokabel a causa del grandor del file. (Vide le nota al fin concernente “Formato gls”)
Ma il ha un altere file svedese-interlingua que consiste de 27 000 entratas lo que suffice e illo es in gls. Il anque ha un file interlingua-svedese ma illo solmente ha 2200 entratas. Tu ipse facilemente pote completar lo secundo tu proprie besonio. Usa p.ex. Stenström; Interlingua-svensk ordbok.

Desde junio 2006 iste duo files es inserite in http://www.interlingua.nu/ in le ligamine ”Läromedel och kurser”. Clicca con le button dextere e quando tu vide “Spara som…” selige ubi le file debe esser salvate ma memora ubi.
Il es multo practic crear un catalogo appellate Vokabel pro omne tal files in formato gls. On anque pote discargar iste files in Yahooogroups ma alora il es necessari adjunger se a Yahoogroups. E isto es gratuite e facile. Aperi le pagina http://groups.yahoo.com/ , clicca sur “Sign up”, plena le formulario, e attende instructiones. Quando tu es un membro tu anque debe cercar membrato del gruppo Vokabel. “Sign in” in Yahoogroups e scribe Vokabel in le quadro “Find a group”. Attende un responsa del moderator ma isto a vices forsan pote durar multe horas (dies?).

In le pagina http://www.pekspro.com/ , in le ligamine Vokabel 2.31, ligamine exempelfiler, glosfiler och översättningar , il ha alcun altere vocabularios in altere linguas

Instruction pro comenciar un quiz

Clicca sur Arkiv/Archivo – Öppna/Aperi e selige un file in formato gls que tu ha salvate in tu catalogo.
Clicca sur Förhör/Quiz. Le plus simple alternativo ibi es numero 1 Standard ma a basso in Förhörsinställningar/Configuration de quiz tu pote seliger plure altere variantes de quiz.

Formato gls (nota) Le formato gls es normalmente reservate pro le programma Babylon Builder. Ma iste files gls pro Vokabel non es adaptate pro uso in Babylon Builder. Si on desira inspectar un tal file o manipular lo il non es possibile aperir lo per duple-cliccar a illo. On debe usar un texteditor commun e dar le commando: Aperir con…(editor seligite).

Bon fortuna!