2013/04/27

Un viage a Budapest



Durante cinque dies in april 2013 mi sposa e io insimul con duo amicos participava in un viage charter a Budapest in Hungaria. Le agentia de viages, ”Favoritresor”, se profila como un agentia pro viages cultural e thematic e nos habeva duo cicerones excellente: Niklas Lindblad qui labora in le Radio Svedese con programmas musical e Susanna Tar (Shushá) un guida local qui habeva studiate svedese in le universitate e habeva recipite un stipendio pro studios in Svedia. Nos volava ab Göteborg via Stockholm e le temperie in Svedia esseva frigide ma quando nos arrivava a Budapest le calor nos incontrava. Quasi toto esseva includite in le precio del viage, solmente duo cenas e un prandio nos ipse debeva arrangiar e pagar. Omne entratas tamben esseva includite.


Mercuridi le 17 de april

Nos nos eveliava a 4 horas in le matino le 17 de april e con auto nos viagiava insimul con nostre amicos al aeroporto Landvetter in Göteborg. Quando nos arrivava a Stockholm-Arlanda aeroporto nos incontrava le altere participantes, totalmente 25 personas, e nostre ciceron Niklas Lindblad. Le volata a Budapest durava 2 horas e 20 minutas.Ibi le temperatura esseva multo agradabile e nos tosto viagiava per autobus, non al hotel, ma al famose monte le Monte de Gellert. Ibi on poteva vider grande partes del citate e le fluvio Danubio que lo divideva in duo partes, Buda e Pest. Originalmente illos esseva duo citates separate ma nunc il ha al minus septe pontes que uni le citates.Post haber admirate le vistas nos recipeva prandio in le restaurante Citadella Panorama Restaurante, consistente del repasto typic hungare, suppa gulash, que esseva deliciose. In plus nos recipeva filet de gallina e al fin Petit Choux.Post isto nos viagiava con le autobus al hotel in Pest, Mercur Korona, que esseva situate multo central al placia Kalvin, solmente 600 m distante de Danubio e le Ponte de Libertate (Szabadság hid). Le hotel esseva multo moderne e munde e con refrigerator e TV in le camera. Nos viveva in le tertie etage ma il habeva plure ascensores e le traffico sur le strata non esseva audibile.

Post haber essite installate in le hotel nos camminava al placia ”Fövám ter” al bordo de Danubio insimul con nostre amicos. Nos nos sedeva in Café Anna ibi e bibeva bira durante que nos admirava alcun juvenes qui vadeva con skateboard sur le placia inclinante e essayava verter le skateboard in aere durante saltos lo que esseva successose a vices.Quando nos retornava al hotel nos reposava un hora ante que nos omnes insimul camminava al restaurante Caroli in le vicinitate. Ibi nos mangiava un bon cena e quando nos retornava al hotel a 21 horas nos esseva multo fatigate e vadeva al lecto. Como jam dicite nos nos eveliava jam a 4 horas in le matino. 


Jovedi le 18 de april 
Nos comenciava le die con un jentaculo excellente in le sala a mangiar. Io appreciava multo que io poteva mangiar yogurt ma io non poteva resister gustar salcicias, bacon e ovos miscite excepte plure sortas de pan con guarnitura.
Postea comenciava un circuito con autobus in Pest lo que es le parte al est de Danubio. Nos vadeva al longe tote le strata Andrassy con su multe magazines e edificios elegante, i.a. le Opera que nos plus tarde visitarea.
Al Placia de Heroes (Hösök Tere) edificate 1896, mille annos post le arrivata del magyares a Hungaria, nos stoppava e admirava le ”Monumento del millennio”, un multitude de statuas i.a. septe statuas equestre que rememora a Arpad e le altere capites del septe tribos original. In le centro sta un colonna que es 36 m alte con un scultptura del archangelo Gabriel qui tene le corona del rege e le cruce duple apostolic in su manos. Detra illos 14 homines de stato in un rango semicircular. Io nunquam ha vidite tante multe statuas in le mesme tempore. Secundo le legenda Gabriel se monstrava pro le prime rege Stephan (Iztvan) (975-1038) e le convinceva converter al christianitate.
Post un tassa de caffe nos continuava nostre viage con le autobus e videva i.a. le tertie grande synagoga del mundo. Illo pote haber spatio pro 3000 personas e esseva edificate in le annos 1850. Durante le occupation german in le Secunde Guerra Mundial illo jaceva in le ghetto.
Al Basilica de Sancte Stephan (Szent Iztvan) nos stoppava e entrava a in le belle edificio catholic roman con multe picturas e auro pellicular. Jam al entrate nos audiva belle canto de choro. Il esseva un choro que trainava e nos stoppava pro vider e ascoltar les. Le acustica sub le voltas enorme esseva remarcabile. Nostre guida contava que le le basilica esseva edificate al limite del aqua de Danubio quando illo esseva disbordate (1878?). Illo esseva preste in 1905. Le grande cupola ha un altitude de 96 m e secundo regulas local nulle edificio debe esser plus alte in Budapest. Le grande cupola sur le parlamento ha le mesme altitude. Le plus grande campana pesa 10 tonnas. Iste ecclesia es le singule que ha un statua de un rege (Szent Iztvan) in vice de Jesus Christo al altar.
Post isto nos stoppava al edificio del Parlamento que vermente es un belle edificio similante a un castello con multe turres. Nos non poteva entrar ma in vice nos visitava le parve Placia del
Martyres (Vértanuk tere) ubi se trova un statua del heroe del libertate  Imre Nagy, stante vidente verso le parlamento sur un parve ponte de arco. Illo esseva edificate al memoria del revolta contra Soviet in 1956. Nagy esseva prime ministro ma post le revolta infortunate ille in 1958 esseva condemnate al morto, per execution al furca, pro alte traition e interrate in un loco anonyme.
 Il es dicite que Chrustjov  esseva desolate quando le successor de Nagy, Janos Kadar refusava amnestiar le. In 1989 ille esseva rehabilitate e ille recipeva un interramento statal quando 100 000 homines participava. Io ipse multo ben rememora iste eventos historic specialmente a causa del facto que duo refugiatos hungare se inscribeva in le mesme curso in le universitate como io, le schola superior  pro veterinarios.
Durante le tour in omne directiones in Pest nos videva i.a. alcun edificios remarcabile. Le Museo de Artes Industrial (Iparművészeti Múzeum) es un edificio multicolor e un exemplo multo clar del Art Noveau e le Grande Mercato coperte (Nagy vásárcsarnok) es in le mesme stilo.
In un restaurante in le secunde etage del Mercato nos mangiava un bon buffet. Nos camminava inter le multe standes de flores, verdura e carne, plen de colores. Io tamben videva rumines de ove o vitello  lo que non es costumari in Svedia. Io comprava 4 salsicias del typo cabanosse. 
Durante le tour in omne directiones in Pest nos videva i.a. ancora alcun edificios remarcabile. Le Museo de Artes Industrial (Iparművészeti Múzeum) es un edificio multicolor e un exemplo multo clar del Art Noveau e le Grande Mercato coperte (Nagy vásárcsarnok) es in le mesme stilo.
In un restaurante in le secunde etage del Mercato nos mangiava un bon buffet. Nos camminava inter le multe stands colorose de fructos, verduras e productos de carne. Io tamben videva rumines de ove o vitello  lo que non es costumari in Svedia. Io comprava 4 salsicias del typo cabanosse. 
In le vespere, post haber mangiate cena,  nos visitava ”Le Palatio de Artes” (Palace of Arts) pro audir un concerto. Le acustica esseva formidabile in le sala de concertos. Le Orchestra Festival de Budapest es considerate como un del dece orchestras le plus bon del mundo. Le programma consisteva de concerto no 4 de Brandenburg per J.S Bach, le prime concerto pro piano e orchestra per Beethoven e le symphonia no 4 de Brahms. Solista in le concerto por piano esseva le famose romanian Radu Lupu qui pareva trovar se ben con le orchestra e le conductor Iván Fischer. Io habeva audite omne obras in avantia proque io ha discos CD con iste obras ma con altere orchestras.


Venerdi le 19 de april
Post le jentaculo nos viagiava con le autobus in le quartieros judee que esseva situate presso nostre hotel. Ante le viage io habeva legite le libro per Ingrid Carlberg, ”Det står ett rum här och väntar på dig”, (Il ha un camera hic te attendente), que describe le vita del diplomate svedese  Raoul Wallenberg qui durante le secunde guerra mundial salvava milles de judeos ab  le campos de morte del nazis. Plure stratas, placias, scholas  e altere locos in le mundo ha su nomine hodie. Quando le armea de Soviet arrivava a Budapest ille dispareva sin tracias. Ille es le secunde persona estranier post Winston Churchill qui ha essite nominate Cive honorific in SUA.
Le viage con le autobus continuava la altere latere de Danubio, a Buda, ubi nos stoppava la castello. Ancora on poteva vider orificios de ballas desde le guerra in le lateres. Il habeva multe scalas.  Ante le entrata del museo sta un statua equestre del prince  Eugène de Savoie-Carignan  qui in le battalia de Zenta in 1697 batteva  le turcos e radeva lor armea in Hungaria.
Il habeva un statua de bronzo  del compositor Zoltan Kodály (1882-1967 . Io lo photographava con mi sposa sedente presso ille.
Sur uno del multe turres del castello il habeva un sculptura de un corvo con un anulo in le becco. Io esseva curiose e in internet io poteva trovar le explication.

Un legenda narra que le general famose János Hunyadi, qui governava durante le juventute del rege Lázló V, e habeva conquirite le ottomanes in le battalia de Belgrad 1456 moriva per peste lo que tamben le juvene rege faceva. Quando on cercava un successor su filio le plus vetule, Lászlo, esseva intendite ma ille  esseva occidite per le habsburgeses. Alora su  plus juvene fratre Mátyas esseva eligite. Ille alora se trova in le corte in Praga, nam ille esseva maritate con un princessa tchec. Secundo le legenda le matre de Mátyas alora inviava un corvo con un anello in le becco con le message. 

Dunque le corvo debeva volar ab Transsilvania a Praga un multe longe distantia. Post isto le corvo con le anello in le becco es inserite in armas del stirpe. Matthias Corvinus qui governava 1458-1490 deveniva le ultime rege hungare e esseva un rege prominente e ben erudite, un rege del Renascentia.
Post haber admirate le vistas in omne directiones nos entrava a in le Museo National enorme. Il es impossibile vider toto e nos seligeva picturas hungare del 19.e 20.e seculos. Nos specialmente admirava un pictura del artista  Tihamér Margitay 1859-1933 appellate ”Jelosia” lo que on pote vider in multe paginas in internet, ma sempre con marcas de aqua pro impedir copias. Io non sapeva que il habeva tante multe bon artistas hungare. Le population de Hungaria es approximativemente equalmente grande como le population de Svedia.
Post le prandio que esseva includite in le precio del viage nos insimul con nostre amicos camminava super le Ponte de Libertate e entrava a in le Banio de Gellert. Ma a causa del belle temperie, 25 grados,  nos non esseva interessate de baniar ibi ma nos solmente comprava un drappo de banio con le texto Gellert como un souvenir.
In le vespere nos viagiava con le autobus al Opera ubi nos videva le opera Arabella per Richard Strauss. Le edificio del opera vermente esseva belle, e le exterior e le interior. Il habeva un grande terrassa in le secunde etage ubi nos stava in le interactos in belle temperie. Eva Bátori jocava le rolo de Arabella e illa cantava multo bellemente. Le rolo principal masculin esseva jocate per Tomasz Konieczny e io le amava
proque ille maestrava le lingua german melio. Secundo mi opinion Bori Keszei como Zdenka esseva le plus bon cantatrice ma le le applausos del publico esseva satis equalmente dividite e non specialmente intense. Io non comprende proque.
In bon tempore io habeva comprate le libretto pro comprender le intriga melio. On cantava in germano e le texto sur le schermo esseva in hungare, dunque incomprensibile pro me. Io tamben habeva ascoltate un registration in YouTube con Kiri te Kanawa e post iste preparationes io non habeva problemas comprender le intriga. Il esseva le prime vice que io videva iste opera in loco.
Nostre chauffeur qui diceva que illa amava hardrock esseva inviate vider le representation e ille esseva multo impressionate e intendeva ascoltar opera plus vices si possibile.

Sabbato le 20 de april
Post  le jentaculo nos viagiava con autobus a Gödöllö circa 20 km al nord est de Budapest. Ibi il habeva un castello belle que esseva edificate per 
Conte Grassalkovich e deveniva famose proque le imperatrice Elisabeth (Sissi) de Austria viveva ibi multe annos. Illa non se trovava ben in Vienna, specialmente non post le morte de su filio Rudolph Illa esseva un extrememente belle femina ma post le morte del filio illa sempre portava vestimentos nigre. Ille esseva multo popular tamben un Hungaria ma esseva assassinate per un anarchista italian in 1898.
Le belle castello esseva damnate multo durante le secunde guerra mundial e per le nazis e per le russos ma nunc illo es renovate.
Quando nos retornava a Budapest nos e nostre amicos faceva un viage con nave sur Danubio durante un hora.
Le ponte de Libertate e le Banio de Gellert 
Le temperie tote le tempore esseva belle e con cornettas acustic nos ascoltava un guida automatic que narrava del attractiones al longe le fluvio.  Le prandio que nos mangiava post le excursion esseva multo tarde. In le vespere nos mangiava cena de adeo ma regrettabilemente iste repasto non esseva equalmente bon como le previe repastos. Suppa a pisce e carne de capreolo, ma le carne esseva partialmente satis dur. Peccato.

Dominica le 21 de april 
Nos retornava a Svedia. Quando nos habeva arrivate a Budapest le primavera quasi non habeva comenciate e il habeva poc flores e verdura. Quando nos nunc retornava il esseva estate complete, multo calide e le arbores habeva comenciate devenir verde. 
Le viage durava inter 11 horas e 22.30 horas e nos esseva fatigate quando nos al fin arrivava a Varberg ubi le hiberno ancora dominava tamben si il non habeva nive.